वैशाली वहिनींच्या नाट्य स्पंदन कार्यक्रमासाठी ओव्या लिहिल्या आहेत. प्रत्येक व्यक्ती आणि त्यांचे गुणविशेष त्यांनी लिहून पाठवले होते.
नमनाची ही ओवी हो, धन्वंतरी साठी हो
स्टेथोस्कोप ला वंदन करून, टाकू पुढचे पाऊल हो
दुसरी आपली ओवी हो, नाट्य स्पंदन जगू हो
छंदाचे हे दळण दळून, जगणे सुंदर करू हो
पुढची आपली ओवी हो, पितृ तुल्य नात्याची
भक्कम पाया रोवून उभ्या, अरद्वाड सरांची
पुढची आपली ओवी हो, स्पंदनाच्या रथाची
समर्थ पणे रथ चालवी, सारथी साक्षात मुकुंद हो
पुढची आपली ओवी हो, यातच आपले हित हो,
लक्षुमी चे रक्षण करण्या सज्ज हा अमित हो
पुढची आपली ओवी हो, नाट्य क्षेत्र कृपेनं
प्रेक्षक राजा अनुभव घेई, "संजय" च्या दृष्टीनं
पुढची आपली ओवी हो, अन्नपूर्णा गिरीजा हो
हातात अक्षय थाळी तिच्या, सज्ज आमची ऋतुजा हो
पुढची आपली ओवी हो, गिरिधरी च्या मायेनं
गोपाळांना अंगण दिले, येलाल्यांच्या कृपेनं
पुढची आपली ओवी हो, सूर ताल जोडीनं
संगीतात प्राण फुंकला, सुधीर च्या नावानं
पुढची आपली ओवी हो, नीर क्षिर विवेक हो
तमातून तेजाला निवडी, हे तर राजहंस हो
पुढची आपली ओवी हो, नाट्यवेडा जोश तो
पुरस्कार मानांकित, आम्हा तुझा संतोष हो
पुढची आपली ओवी हो, रवी तेजाची शान हो
अभिनयाच्या जोडीने, त्या संगीताची जाण हो
(स्त्री आणि पुरुष कलाकारांना पुढील दोन ओव्या समर्पित)
पुढची आपली ओवी हो, नटराजाचे पाईक हो
रंग मंचा वंदन करती आमचे अष्ट नायक हो
पुढची आपली ओवी हो, स्त्रीशक्ती चा आदर हो
नवरस अंगी लेऊन आम्ही नवदुर्गा या होऊ हो
निर्वाणी ची ओवी हो, रंग देवता प्रसन्न हो
डॉक्टर झाले ऍक्टर, आता तू विजयाची गुढी हो
-- अवनी गोखले टेकाळे
